Британ ертегісі: Джәк бақытын іздеп шыққанда

Британ ертегісі: Джәк бақытын іздеп шыққанда

Ертеде Джәк деген бала ержетіп, өмірдегі өз бақытын табу үшін сапарға шығады. Үйінен көп ұзамай жатып-ақ оған мысық кездеседі.
‒ Жол болсын, Джәк!
‒ Әлей болсын!
‒ Иә, қайда бара барасың?
‒ Өмірдегі өз бақытымды іздеп барамын.
‒ Мен де барайыншы сенімен бірге.
‒ Мейлің. Көппен жүрген көңілді.
Жиглти-жолт, жиглти-жолт деп екеуі келе жатса, алдарынан ит кездеседі
‒ Жол болсын, Джәк!
‒ Әлей болсын!
‒ Иә, қайда бара барасың?
‒ Өмірдегі өз бақытымды іздеп барамын.
‒ Мен де барайыншы сендермен бірге.
‒ Мейлің. Көппен жүрген көңілді.
Жиглти-жолт, жиглти-жолт деп үшеуі келе жатса, алдарынан ешкі кездеседі.
‒ Жол болсын, Джәк!
‒ Әлей болсын!
‒ Иә, қайда бара барасың?
‒ Өмірдегі өз бақытымды іздеп барамын.
Мен де барайыншы сендермен бірге.
‒ Мейлің. Көппен жүрген көңілді.
Жиглти-жолт, жиглти-жолт деп төртеуі келе жатса, алдарынан бұқа кездеседі
‒ Жол болсын, Джәк!
‒ Әлей болсын!
‒ Иә, қайда бара барасың?
‒ Өмірдегі өз бақытымды іздеп барамын.
‒ Мен де барайыншы сенімен бірге.
‒ Мейлің. Көппен жүрген көңілді.
Жиглти-жолт, жиглти-жолт деп бесеуі келе жатса, алдарынан ешкі кездеседі.
‒ Жол болсын, Джәк!
‒ Әлей болсын!
‒ Иә, қайда бара барасың?
‒ Өмірдегі өз бақытымды іздеп барамын.
‒ Мен де сендермен бірге барайыншы.
‒ Мейлің. Көппен жүрген көңілді.
Жиглти-жолт, жиглти-жолт деп алтауы келе жатса, алдарынан әтеш кездеседі
‒ Жол болсын, Джәк!
‒ Әлей болсын!
‒Иә, қайда бара барасың?
‒ Өмірдегі өз бақытымды іздеп барамын.
‒ Мен де сендермен бірге барайыншы.

‒ Мейлің. Көппен жүрген көңілді.

Сонымен Джәк бес досымен алтау боп, «жиглти-жолт, жиглти-жолт» деп келе жатады. Кеш қарайып, қараңғылық түскенде олар түнеп шығатын жер іздей бастайды. Осы кезде Джәктің көзі жолдың шетіндегі бір үйге түседі. Бұл үйде кім бар екен, барлап келейін, сендер мен келгенше тыныш отыра тұрыңдар деп кетеді. Терезеден үңілсе, үйде бір топ ұры алтын санап отыр. Джәк қуанып:

‒ Анау алтын менікі болады. Бақытын тапты деген осы, ‒ дейді.

Джәк достарына қайта оралып, «мен ымдаған кезде бар өнерлеріңді салып шулаңдар» дейді.

Джәктің бұйрығы жетісімен-ақ мысық мияулап, ит абалап, ешкі бақылдап, бұқа мөңіреп, әтеш шақырып төңірек азан-қазан болады да кетеді. Ұрылар зәрелері ұшып, тұра қашады. Алты дос ішек-сілелері қатқанша күледі, Босаған үйге кіріп, алтынды иемденіп, жақсылап жайғасып алады. Әйтсе де, Джәк ұрылардың қайтып оралуынан қауіптеніп, ұйқыға жатардың алдында сақтық шараларын жасайды. Мысықты тербетілгіш креслоға отырғызып, итті үстелдің астына жатқызып, ешкіні жоғарғы қабатқа жіберіп, бұқаны кілетке кіргізіп, әтешті үйдің шатырына қондырып, өзі төсекке жатады.

Қараңғылық қоюланғанда ұрылар «үйде қалған ақша не болды екен, біліп кел» деп өз адамын жібереді. Көп ұзамай-ақ ол өкпесі ұшып қайтып келеді.

‒ Үйге кіріп, тербелгіш креслоға отыра бергенім сол еді, шұлық тоқып отырған бір кемпір жамбасыма тоқыма бізін сұғып алды.

(Сезіп отырған шығарсың, бұл мысық болатын).

Ақшаны үстелдің астынан іздеп едім, онда бір етікші отыр екен, бігізімен бетімді тырнап алды.

(Бұл, әрине, ит еді).
Жоғарғы қабатқа атып шығып едім, онда бір адам бидай бастырып жүр екен, тоқпағымен басымнан қойып қалды.
(Бұл ‒ Джәктің ешкі досы ғой).
Есімнен танып, кілетке кіріп кетсем керек, онда біреу ағаш жарып тұр екен, балтасын жалаңдатып ала жүгірді.
(Бұл ‒ Джәктің бұқа досы болатын).
Мұның бәрі ештеңе емес, бәрінен де шатырдағы бойы бір қарыс жігітті айтсаңшы! «Тұтқындаңдар мынаны! Әкеліңдер маған! Тұтқындаңдар мынаны! Әкеліңдер маған!» деп дүниені басына көтере аттандағанда әрең қашып құтылдым, ‒ дейді.
(Әрине, бұл ‒ Джәктің әйгілі әтеш досы еді).



Мақала ұнаса, бөлісіңіз:


Іздеп көріңіз:
ертегі Джәк бақытын іздеп шыққанда туралы британдық ертегілер, британдық ағылшын ертегілер текст, ертеги Джак бакытын издеп шыкканда туралы британдык ертегилер, Джәк бақытын іздеп шыққанда

Пікір жазу

  • [cmxfinput_gallery][cmxfinput_youtube]